ЗӨВЛӨГӨӨ

Архигүйгээр чин сэтгэлээ нээж , дотроо уудлаж , баярлаж хөөрч сурцгаая

Нара: Ний нуугүй хэлэхэд “ширээний хүүхэн” гээд маш их элдвээрээ хэлүүлдэг байсан. Би японд байхдаа бааранд ажиллаж байсан тухайгаа ярьчихсан учраас тэгж хэлэгддэг юмшиг байгаа юм. Тэндээс миний харсан алкохольны соёл нь юу байсан бэ гэхээр , баарч юмуу , лоунжид ирсэн хүн шил виски ч юмуу , коняк авсан бол тэрийг хэзээ ч нэг дор ууж дуусгадаггүй. Хэдүүлээ ч ирсэн бай ууж дуусгадаггүй соёлтой.

Бид нар дэлхий нийтийн чиг хандлага руу уусаж байна. Дэлхийн бүх хүмүүсийн хэрэглэж байгаа хэрэгцээг бид нар хэрэглэж байгаа шүү дээ. Тийм учраас дэлхийн чиг хандлагын СОЁЛТОЙ уялдаа холбоотой явах ёстой байх гэж боддог юм. Яагаад заавал архи байж чин сэтгэлээ нээдэг , архи байж үнэнээрээ байдаг байх ёстой гэж?

Яагаад хүн зүгээр архигүй ч гэсэн , халаалтгүй ч гэсэн үнэнээрээ байж болохгүй гэж? Яагаад архигүй мөртлөө дэврүүн сэтгэлтэй байж болохгүй гэж? Яагаад архигүйгээр цагийг зугаатай өнгөрөөж болохгүй гэж?

Найзууд нь ч гэсэн ялангуяа ганц бие биш, гэр бүлтэй найз нөхдийгөө урихдаа бас учиртай байх хэрэгтэй юмшиг санагдаад байдаг юм. Гэтэл манайхан чинь аймаар. “Өө чи миний найз биш юм байна” , “би чамайг ингэж бодсон чинь” , “өө чи од болчихож” , “чи ийм болчихож” гэх мэт дандаа үг хаядаг.

Дээрээс нь баярын ширээний ард суухаараа заавал нөгөө шилтэй юмыг хоослох гээд л бие биенийгээ шахаад л. Одоо тэр бол хамгийн хоцрогдон , бүдүүлэг зан болсон. Баяраар гэр бүл найз нөхдөөрөө хайр талархал дүүрэн байхад заавал архи хэрэггүй ээ. Багахан сайхан дарс, шампанск буудуулаад л хундага тулгалаа , дарсаа шимлээ ингээд л хэтрүүлэггүй юм бүхэн сайхан шүү дээ.

Яаж үүнийг ухаалгаар багасгах вэ гэдэг арга дээр илүү их төвлөрвөл зүгээр. Жишээлбэл ганцхан шил шампань дарстайгаар баярын ширээ болон баяр маань гоё л болно шүү дээ. Заавал дахиад л архи тавиад л , коняк , виски өрөөд л , тэгээд тэрийгээ заавал дуусгах ёстой юмшиг хандах хэрэгтэй гэжүү?

Ялангуяа 7 хоног болгоны 5 дахь өдөр бүр шоудна гэвэл яг үнэнийг хэлэхэд эдийн засгийн төдийгүй , гэр бүлийн харилцаанд хүртэл маш их сэв суулгаж байгаа шүү дээ. 5 дахь өдөр бүр шоудаал хагас сайн өдөр нь шартаж хэвтээд л , тэгээд бүтэн сайн өдөр нь арай гэж босоод л ингэж байтал бүтэн сайн дуусаад л . Энэ чинь маш харамсалтай байхгүйюу. Цаг хугацаа маш хурдан өнгөрч байна. Амжиж гэр бүлийнхээ аз жаргалыг , амжиж өөрийнхөө эрүүл мэндийг , амжиж энэ өдөр хоногийг сайхан өнгөрөөхгүй бол , тасраад л шартаад л явах чинь их муухай мэдрэмж байдаг. Залуучуудыг ялангуяа ийм мэдрэмжийг битгий аваасай гэж боддог. Харамсалтай нь ихэнхдээ залуу насандаа хорин хэдэн насандаа энэ мэдрэмжийг авчих гээд байдаг. Тэгэхдээ шинэ үеийн залуучууд тэр дундаа зэт үеийхэн маш ухаалаг , хэрэглээ зөвтэй болчихсон юмчинь нийгмээ манлайлаад яваасай гэж их хүсэж байна” хэмээн архины хэрэглээний талаар өөрийн үзэл бодлоо хуваалцлаа.

Эх сурвалж: Цагдаагийн Ерөнхий Газрын Урьдчилан сэргийлэх хэлтэс

ГОО БҮСГҮЙЧҮҮД

Уран гоо , Үзэсгэлэн гоо , Дуучин Б.Батцэцэглэн

“Эмээтэйгээ адилхан дуулдаг, ээжтэйгээ өвчсөн мэт ижилхэн” гэх үгэнд урамшин, тэднийхээ үргэлжлэл гэдэгтээ бахархаж өнөөдрийг хүрсэн Соёлын тэргүүний ажилтан, Үндэсний урлагийн их театрын гоцлол дуучин , Уртын дуучин Б.Батцэцэглэнг энэ удаагийн нийтлэл дээрээ онцоллоо. Тэрбээр ард түмний сэтгэлд хоногшсон ардын болон уртын дуунуудыг шаглаж дуулдаг, авьяаслаг , чадварлаг уран бүтээлч билээ.

Дөрвөн охинтой айлын хамгийн бага тэрээр багаасаа эмнэг сургах , мал хариулах гээд хөдөөний олон ажлыг нугалдаг байсан бөгөөд эмээ нь анх ардын дуу зааж өгсөнөөр дуучин болох гарааг нь эхлүүлжээ.

Говийн уудам талын өссөн орчин нь түүнд ардын бөгөөд уртын дуу дуулахад маш ихээр нөлөөлжээ. Уран бүтээлчдийг ар гэр нь ойлгож дэмжихээс олон зүйл шалтгаална. Түүний гэр бүлийн хүн мөн урлагийн хүн учраас маш их дэмжихийн зэрэгцээ уран бүтээлд нь тус болж хамгийн эхний сонсогч нь болдог байна.

Урлагын бүх хувцасаа өөрөө урлаад өмсчихдөг урлагыхан ховор бизээ. Өөрийнхөө ихэнх дээл, хувцасыг өөрөө урладаг , мөн өөрийн зүүх бүсээ ч ийнхүү өөрөө урладаг уран бүсгүй дээ.

Уран бүтээл хийхгүй удахаар нутгийн маань малчид “яагаад зурагтаар гарахгүй байна” гээд залгадаг юм, тийм л үйлдэл нь урам зориг өгдөг хэмээжээ.

Монгол өв уламжлал, ахуй соёлоо тээж залууст үлгэрлэн харуулахыг хүсдэг тэрбээр хүүхэд насандаа эмээтэйгээ бууз хуушуур хийн зарж, хөдөлмөрийн үнэ цэнийг мэдэрч явжээ. Дуучин эмэгтэйн хувьд эмээтэйгээ өнгөрүүлсэн энэ цаг хугацаа, амьдралынх нь хамгийн нандин сайхан үе болох талаар urug.mn сайтад өгсөн ярилцлагаараа хуучилсан юм.

Тэрбээр энэ талаар ярихдаа, “Сүүлийн үед уран бүтээл маань олноор төрөн гарч байна. Хамгийн сүүлд “Баян Монгол” дуундаа клип хийж, үзэгч олондоо өргөн барьсан. Тоглолтоо хийж буй болохоор янз бүрийн мэдээллүүд сошиалаар явж л байна. Нэг мэдээний доор, “Өө энэ чинь хуушуур, бууз хийгээд л зараад явдаг байсан” гээд л бичсэн байсан. Би үүнд хэзээ ч эмзэглэхгүй. Ингээд хэлчихвэл доошоо орно гэж бодсон юм шиг байгаа юм. Манай эмээ хэлдэг байсан. “Хүн юу ч хамаагүй хийгээд сурах хэрэгтэй. Яаж амьдрахыг хэн ч таашгүй. Тиймээс сурсан зүйл гэдэг хэзээд хэрэг болж, аминд орох үе ч бий” гээд ярьдаг байсан юм. Ийм хүмүүжлээр өссөн би өнөөдөр алдах биш оноод л явж байна” хэмээжээ.

Мөн түүний хувьд урлагийн амьдралаасаа хааяахан шантрах үе бишгүй тохиолддог талаараа хуваалцсан юм. Уран бүтээлчид үзэгчдийн оюун, сэтгэлийг цэнгээж, гуниглуулж, соён гэгээрүүлэх хүндтэй үүргийг хүлээсэн ч тэд төгс хүмүүс биш. Төгс байх ч боломжгүй. Тиймдээ ч тайзан дээр өөртөө сэтгэл ханамжгүй дуулсан үедээ гутарч, өөрийгөө “дуучин биш” гэж хатуухан дотроо зэмлэх үе түүнд олон тохиожээ. Гэсэн ч эмээгийнхээ хүсэл мөрөөдлийг үргэлжлүүлж, итгэлийг нь даах гэж хичээж буй тэрбээр шантарсан ч эргээд босох хүч байдаг талаараа ярилаа.

Тэрбээр, “Би ачтан буурлуудынхаа ачийг хариулж барахгүй ч гэсэн хичээж байгаа. Сүүлд ээжийнхээ хэлсэн үгэнд тоймгүй их баярласан. Ээж маань “Миний охин ээжийнхээ ачийг хариулчихсан гэж бодоорой” гэх үгийг сонсоход нулимс мэлтэлзээд явчихсан. Хүн хэзээ ч ээжийнхээ ачийг хариулж чадахгүй л дээ. Гэхдээ л тийм үг сонсох сайхан юм билээ. Ээж минь миний өдий зэрэгтээ явж байгаад баярлаад л ингэж хэлсэн байх” гэсэн юм.

Мөн “Зууны мэдээ” сонины “Өөр зочин” буланд өгсөн түүний дараах ярилцлагыг хүргэе.

Сэтгүүлч: Та сүүлд “Баян Монгол” гэсэн уран бүтээлээ сонсогчдод хүргэсэн. Энэ дуу төрсөн түүхийг сонирхмоор санагдлаа?

“Баян Монгол” уран бүтээлийн аялгууг нь М.Дугаржав зохиож, өөрөө дуулж пянзанд бичүүлсэн байдаг. Харин үгийг нь Н.Наваан-Юндэн бичсэн. Мөн энэ дууг дахин намайг эгшиглүүлэхэд Улсын Филармонийн симфони найрал хөгжим, УДБЭТ- уран бүтээлчид, Үндэсний урлагийн их театрын бүжгийн ангийнхан хамтарлаа. Олон уран бүтээлчийн хүч хөдөлмөр, сэтгэл шингэсэн сайхан уран бүтээл болсон. Миний хувьд хуучны сайхан дууг сонсогчдын сэтгэлд хүрсэн тэр л хэвээр нь буюу М.Дугаржав гуайн дуулснаас хэт өөрчлөөгүй гэдгээрээ онцлог болов уу.

Сэтгүүлч: Энэ дуунаас гадна хуучны олон бүтээлийг сэргээж дуулсан. Ер нь дуулах бүтээлээ сонгохдоо ямар зарчим баримталдаг вэ?

Би уран бүтээлийн хоёр цомог гаргасан. Мөн цомогт ороогүй, шинээр дуулсан дуунууд, студид бичүүлж амжаагүй ардын дуу олон бий. Миний хувьд хуучны дуу дуулахаар сонгохдоо өмнөх дуучны дуулалтыг давталгүйгээр тухайн дууг өөрийн болгож, дахин амьдруулахыг хүсдэг. Үүний тулд судалгаа багагүй хийдэг.

Сэтгүүлч: Судалгаа хийх явцад ардын болон уртын дуутай холбоотой олон сонирхолтой баримт олддог байх даа?

Монголчууд бид уртын болон ардын дууны баялаг түүхтэй ард түмэн. Миний хувьд тухайн дууг сонгохдоо их болгоомжтой ханддаг. Учир нь тус бүтээл дахин давтагдашгүй. Хүмүүсийн сэтгэлд хоногшсон бүтээлийг сэргээж дуулах мэдээж хэцүү. Уран бүтээлчийнхээ хувьд алс ирээдүйгээ хардаг. Олон жилийн дараа үр хүүхэд, ач зээ маань ээж, эмээгийн дуулсан дуу гээд сонсоно шүү дээ. Тиймээс тэдэндээ сайхан дурсамж, уран бүтээл үлдээхийг эрмэлздэг. Учир нь би ч ялгаагүй өмнөх үеийн дуучдаа сонсож өссөн. Магадгүй тэр сайхан уран бүтээлчдийн бүтээл, аялгуу эгшгээр хөглөгдөж, өнөөдрийн уран бүтээлээ туурвиж байна.

Сэтгүүлч: Та Дорноговь аймгийнхаа нэрийг гаргаж яваа уран бүтээлч. Энэ сайхан нутгийн энерги таныг хамгаалж, дагаж явдаг болов уу?

Би Дорноговь аймгийн Улаанбадрах сумын уугуул. Миний уран бүтээлийн ард энэ сайхан нутгийн минь уул ус, ард түмнийх нь буян заяа түшээстэй бий. Нутгийн удирдлагууд ч шинэ бүтээлийг минь сайн дэмждэг. Анх СУИС-д ороход манай нутгийн зөвлөлийн дарга н.Одонтуяа эгч надад итгэл хүлээлгэж байлаа. Энэ хүний дэмжлэгээр дуучин болох сонголт хийсэн.

Сэтгүүлч: Үндэсний урлагийн их театр хэмээх их айлтай хэрхэн хувь заяа, уран бүтээлээ холбов?

2006 онд ардын богино дуу дуулаачдын улсын уралдаан гэж болсон. Энэхүү уралдаанд би Дорноговь аймгаасаа зорьж ирээд, хөгжмийн цөөхүүлтэй нь хамтарч оролцсон юм. Анх ингэж л энэ том байгууллагын хаалгаар алхсан түүхтэй. Харин 2013 онд СУИС-ийг төгсөөд театртаа албан ёсоор дуучин нь болж байлаа. Аливаа улс үндэстнийг соёлоор нь шинждэг гэж дэлхийн урлаг судлаачид үздэг. Монголчуудын хувьд соёл, үндэсний, язгуур урлагийн баялаг түүхтэй. Манай театрын хувьд энэ түүх, үндэсний баялгаа олон улсад сурталчилж, таниулах том зорилготой.

Сэтгүүлч: Уртын болон ардын дууны том ялгааг юу гэж боддог вэ?

Зохиогдсон цаг хугацааны хувьд хоорондоо ялгаатай. Уртын дуу нь арай түрүү үеийнх. Манай улсын хувьд суурин иргэншил буюу хүрээ үүссэн цагаас ардын дуунууд зонхилж эхэлсэн. Түүнээс өмнө үед ард иргэд маань ихэвчлэн уртын дуу дуулдаг, аялдаг байжээ. Мөн дуулах арга барилын хувьд тэс өөр. Тухайлбал, уртын дуу нь том цараатай учир амьсгаа их шаарддаг. Харин ардын дуу дуулахад нь илүү хэв маяг, эв хэрэгтэй

Сэтгүүлч: Та энгийн үед ч ихэвчлэн монгол дээлээр гоёдог. Тоглолтын хувцас, дээлээ өөрөө урладаг гэсэн үү?

Дунд сургуулийн сурагч байхдаа л дээл оёж сурсан. Эмээтэйгээ өссөн минь дээл урлахаас эхлээд хөдөлмөрч чанарт сургасан гэж боддог. Тиймээс зүгээр суух дургүй. Ер нь тоглолтын хувцсаа өөрөө ихэвчлэн урладаг байлаа. Харин сүүлийн жилүүдэд ажлын ачааллаас шалтгаалаад загвар, санаагаа хэлээд төрсөн эгчээрээ оёулдаг болсон.

Сэтгүүлч: “Үлэмжийн чанар” дууг таны дуулснаар хүмүүс сонсох дуртай. Дуу эзнээ олно гэдэг нь энэ байх даа?

“Үлэмжийн чанар” дууг багаасаа сонсож өссөн. Манай гэр Хамрын хийдээс урагшаа 50 километрийн зайд байдаг байлаа. Тиймдээ ч нутгийн гайхалтай хутагтын бүтээсэн энэ дууг урын сандаа оруулах нь миний хувьд нэр төр, хариуцлага болов уу.

Сэтгүүлч: Өнөө үеийн ардын болон уртын дууны хөгжлийг дэлгэрүүлэхийн тулд яах хэрэгтэй гэж боддог вэ?

Дуучид сайн уран бүтээл хийх хэрэгтэй. Нэг дууг олон дуучин дуулах тусам хүмүүс сонсоно. Энэ нь уран бүтээлчдийн дунд өрсөлдөөнийг бий болгодог. Үүнээс хөгжил эхэлнэ гэж бодож байна. Учир нь олон сайхан ардын болон уртын дуу төрснөөр энэ урлагийг сурах хүсэлтэй хүүхэд нэмэгдэнэ. Б.Батболд багш маань “Уртын дуу, ардын дуу эгшиглэх тусмаа хөгжинө. Дуулахгүй байвал замхарна” гэж байнга хэлдэг байлаа. Багш маань уртын дууг түгээн дэлгэрүүлж, өвлүүлэх үйл хэргээ их сайн хийсэн.

Сэтгүүлч: Таныг пянз гаргах гэж байгаа гэж сонссон. Энэ ажил тань хэр урагштай байгаа вэ?

Ардын дууны пянз гаргах болон анхны бие даасан тоглолтоо хийхээр төлөвлөж байна. Пянзны ажил 90 хувьтай явж байна. Мөн энэхүү пянз маань орчин үеийн хөгжмийг ардын хөгжмийн дуугаралттай хослуулснаараа онцлог. Зарим дуучдыг харахад тоглолт хийхдээ өөрөө 3-4 дуу дуулаад тайзнаас бууж, өөр уран бүтээлчийг урьдаг. Харин миний хувьд тайзан дээр тасралтгүй 30 минут дуулахаар төлөвлөж байгаа. Мөн энэ удаагийн тоглолт маань амьд хөгжимтэй тоглох учир үзэгчдэд илүү бодит мэдрэмжийг төрүүлнэ гэдэгт итгэж байна” гэжээ.

Ардын дууны донж, хэв маягийг харуулсан, өвөрмөц уран бүтээлүүдээрээ үзэгчдийн хүндлэлийг хүлээсэн энэхүү уран бүтээлч бүсгүй маань анхны бие даасан тоглолтоо 2022.11.23-нд Соёлын төв өргөөнд толилуулах гэж байна. Тус тоглолт ардын болон уртын дууг үндэсний хөгжим, амьд хөгжимтэй хоршуулах гэж байгаагаараа онцлогтой болох аж. Өөрөөр хэлбэл уламжлал шинэчлэлийг хослуулж, үнэнч үзэгчдэдээ, ардын дуунд дуртай хэн бүхэнд бэлэг барихаар болжээ.

Тэрбээр тоглолтын талаар өөрөө ярихдаа “Өөрийнхөө уран бүтээлээс дээжлэн үзэгч олондоо хүргэх гэж байгаадаа баяртай байна. Энэ бол ашгийн бус тоглолт гэдгийг хэлэх нь зүйтэй болов уу. Тоглолтын тайзнаас авхуулаад олон зүйлд ач холбогдол өгч, хүрэлцэн ирсэн хүн бүхэнд зориулсан орчин бүрдүүлэхээр хичээж байна. Үүднээсээ эхлээд л монгол ёс заншил, идээ будаа, монгол ахуй амьдрал “үнэртсэн” орчин таныг угтах болно. Тоглолт үзэхээр ирэхдээ үзэгчид маань гэр бүлээрээ, найз нөхдөөрөө зураг авхуулах боломжийг ч бүрдүүлэхээр манай баг хамт олон ажиллаж байна. Та бүхэн тоглолт үзэхээр ирэхдээ үндэсний дээл хувцсаа өмсөн ирж, ардын дууны найрын үдшийг хамтдаа бүтээгээсэй гэж чин сэтгэлээсээ хүсэж байна” гэсэн юм.

Тоглолтод Үндэсний урлагийн их театрын уран бүтээлчид, Улсын филармонийн симфони найрал хөгжим, Морин хуурын чуулга, Цэргийн дуу бүжгийн чуулгын найрал дуучид болон Монгол Улсын Ардын жүжигчин Д.Жаргалсайхан, Хөгжмийн зохиолч, Урлагийн гавьяат зүтгэлтэн Б.Чинбат, Гавьяат жүжигчин Ө.Уянга нарын уран бүтээлчид оролцох ажээ. Мөн үргэлжлүүлээд орон нутгуудаар өөрийн тоглолтоо төлөвлөсөн байгаа ажээ.

Монгол эмэгтэйн Уран гоо, Үзэсгэлэн гоо, Авьяас төгөлдөрийг өөртөө шингээсэн, ухааны сайхан аашны сайхан цөм бүрдсэн бүсгүйдээ сайн сайхан бүхнийг хүсье. Урлагын Янжинлхам бурхан үргэлж ивээж байг.

Эх сурвалж: Urug.mn , ikon.mn , zarig.mn , Зууны мэдээ сонины 2022.11.04-ний өдрийн мэдээ ,

ЭЕРЭГ МЭДЭЭ

Урлагийн хос багана Тэмка, Нарансолонго нарын гэр бүл

Урлагаас төрсөн Монголын сайхан гэр бүлүүдийн нэг бол яахын аргагүй С.Тэмүүжин , Г.Нарансолонго нар билээ.

X-түц продакшнаасаа өрх тусгаарлан өөрсдийн Эмоци продакшныг бий болгон чамгүй амжилтийг гарган яваа билээ.

Г.Нарансолонгыг ихэнх хүн гоё нүдтэй гэдэг бол Тэмка түүний чихэнд татагдаж байсан гэнэ. Харин бүсгүй маань ирээдүйн нөхрийнхөө цэвэрч , дэгжин байдалд татагдсан ажээ.

Одоо тэрээр гурван сайхан хүүхдийн аав ээж болон аз жаргалтай сайхан амьдарч байна.

Тэмка нэгэн удаа ярилцлагандаа: Монгол ард түмний хайртай эмэгтэйг эхнэрээ болгон авсан учраас хайртай эмэгтэйгээ муу явуулах эрх надад байхгүй хэмээн хэлж байжээ.

Нарансолонго маань нэгэн ярилцлагандаа: Манай Тэмка их халамжтай. Гэрт зочин ирвэл Тэмка маань л гардаж хоол хийнэ, би бол туслах тогооч маягаар л тусалдаг. Нөхөр маань өөрийнхөө хийнэ гэж зорьсон юмаа заавал хийж гүйцэлдүүлж байж л санаа нь амардаг тууштай хүн. Уурлах нь амархан , уур нь гарахдаа ч амархан бүх юм нь ил хүндээ.

Би бол их дөлгөөн , тайван хүн. Харин нөхөр маань их хөдөлгөөнтэй хүн. Нэг нэгнийхээ сул талыг нөхдөг. Бид уран бүтээлээ хийгээд үүрээр орж ирэх үе олон ч дуртай ажлаа хийж байгаа болохоор сэтгэл ханамжтай байдаг. Нөхөр маань аливаад чин сэтгэлээсээ хандаж, аливааг болгож бүтээхийн төлөө тэмцдэг хүн” хэмээн нөхрийнхөө тухай ярьсан юм.

С.Тэмүүжин “Boomtown” хамтлагт бүжиглэн урлагийн гараагаа эхэлж байсан билээ. Түүний ээж МҮОНТ-д ажилладаг байсан нь магадгүй урлагтай холбогдох нэг нөлөөлөл байсан байж магадгүй. Харин Г.Нарансолонгын хувьд 1998 онд СУИС-т орж , 19 насандаа “Зүүд шиг хайр” кинонд анх тоглон урлагийн гараагаа эхлүүлж байжээ.

Олон жил ханилан амьдарч буй үлгэр жишээ болсон хосуудынхаа гэр бүлд сайн сайхан бүхнийг хүсэн ерөөе.

ЗӨВЛӨГӨӨ

ХҮҮХДИЙГ УЯХ НЬ ЗӨВ ҮҮ БУРУУ ЮУ?

Өвөг дээдэс хүүхдийг уяандаа чангарч байдаг, уяж байсан хүүхдийн хөл майга болдоггүй, уяа хүүхдийг хөлд түргэн оруулдаг гэдэг. Уяа хүүхдийг багаас нь танин мэдэх үйл ажиллагааг хөгжүүлэхэд тусладаг.

Хүүхдийг бүр их мэдээ орохоос нь өмнө уядаг. Мэдээ орчихвол хүүхэд уяулдаггүй. Тийм учраас хүүхдийг 8 сартайгаас нь гурван нас болтол буюу мөлхөж эхэлснээс хөлд орох хугацаанд уях нь зүйтэй.

Анх эхэлж хүүхдийг уяхдаа өдрийн сайныг сонгон байж хүүхдийн сүлд, сайн өдөр нь уядаг заншилтай. Бүс нь өвөөгийн ч юмуу, аавынх нь бүс байвал илүү зүйтэй гэдэг. Хүүхдийн уяа нь хонин холбоо юмуу тооно туших зэрэг төвөггүй тайлах зангидлагатай байна. Хүүхдийнхээ сугаар юмуу бүсэлхийгээр нь оосорлон уяна.

Хүүхэд тогтдоггүй айлын хүүхэд, энхрий хүүхдийг зарим нутагт уурганы хуйваар уядаг. Хүүхдийг гэрийн хана юмуу орны толгой, орны дээр тавьдаг ширдэгнээс уяа гаргаж түүнээс уядаг байв.Дархадууд хүүхдийг алхаж сургахдаа нэгээс 2 метр урт 50-60 см өндөр хашаархуу хайс хийж, тэдний суудаг газрын өмнө газар дээр тавьж өгдөг байсан ажээ.Хүүхэд түүнээс түшин хөлд амархан ордог байна.

Мөн баруун цастын халхчууд дээсээр оосорлон бургасан араг дотор суулгадаг байжээ. Мөн ийм байдалтайгаар хүүхдээ тэмээнд тэгнэж нүүж суудаг байсан байна. Уяа нь галд хүрэхээргүй хэмжээний байх шаардлагатай. Хүүхдийн мөлхөх, явахад нь тааруулан уядаг.

Хүүхдийг өөрөө халуун, хүйтнийг мэдэх, мэдрэх, галд ойртож болохгүй гэх зэргийн хориотой зүйлсийг мэддэг болтол нь уяагаар уядаг уламжлалтай. Мөн хүүхэд босож тэнцвэрээ олох байдал нь сайжирч хэдий дахин дахин унах боловч зоригтойгоор босож  нэг ёсны дасгал болдог байна. Мөн хүүхдийн бие махбодь булчингийн үйл ажиллагаанд ч чухал нөлөөтэйгээс гадна гэнэтийн уналтаас үүсэх тархины доргилт, элдэв гэмтлээс урьдчилан сэргийлэх ач холбогдолтой.

Уяатай хүүхдийн өмнүүр нь гардаггүй. Хүүхдэд өвчин эмгэг тусна гэдэг.Хүүхдийг мэдээ орж, зөв буруу, сайхан муухай, сайн мууг ойлгодог болсны дараа уяаг нь авдаг. 2-3 нас хүртэл нь ч уядаг. Уяанд сурсан хүүхэд өрөвдөлтэй биш харин бие дааж, орчин тойрондоо дасаж, хүмүүжиж байдаг гэдгийг эцэг эхчүүд ойлгох хэрэгтэй.

Орчин үед хүүхдийг уях бус хөлд оруулах тэргэнд  оруулах нь элбэг болжээ. Энэ нь хүүхэд гэнэтийн уналт болон бусад ахуйн хэрэгсэл гал усанд өртөх аюулаас найдвартай хамгаалж чадахгүй гэдгийг анхаарах хэрэгтэй мөн хүүхдийг сууж сураагүй буюу нурууны яс бэхжиж эхлээгүй үед хөлд оруулагч тэргэнцэрт оруулснаар нурууны хөгжил буруу явагдах аюултайг мэдэхэд илүүдэхгүй бизээ.

Уяа нь ийнхүү хүүхдэд сайн дом болохын зэрэгцээ шинжлэх ухааны үүднээс маш сайн ач холбогдолтой зүйл юм.

ЭХ СУРВАЛЖ: Mongolia-trade.com

ЭЕРЭГ

Пакистаны амьтны хүрээлэнгийн Монгол тэмээ Монголчуудаа танин , дагаж уйлжээ

Улаанбаатраас Австралийн Сидней хот хүртэл 50 мянган километр замыг машинаар туулж яваа нэгэн гэр бүл Монголчууддаа нэгэн дараах мэдээллийг хүргэлээ.

Тэд Пакистан улсын Мултан хотын амьтны хүрээлэнд Монгол 2 бөхтэй тэмээ байдгийг дуулаад хэрэг болгон зорин очижээ. Хоёр бөхтэй Монгол тэмээ өөрийг нь зорин очсон Монголчуудаа хөөс, хөөс гэхийг сонсоод нулимс бөмбөрүүлэн дагасан тухай аялагч залуу ярин өөрийн сошиал хуудаснаа бичлэгийг тавьсан байна

“Энэхүү тэмээ эхийнхээ хээлэнд Монголоос ирсэн ба эх нь буюу ингэ нь хамарсалтай нь үхэн өнчин үлдсэн тэмээ” болох талаар амьтны хүрээлэнгийн ажилтнууд хэлсэн байна. Харин нутгийн нэг эмэгтэй тэмээг байсхийгээд нэг эргэж ирдэг талаар мөн хэлсэн байна.

Эцэст нь аялагч залуу Монгол малчдыг таван хошуу малаа гадаадын улс орнууд руу битгий явуулаарай хэмээн уриалга болгон хэлэв.

ЭЕРЭГ МЭДЭЭ

Вокзалын төгөлдөр хуурч залуу хорт архинаасаа татгалзаж чаджээ

“Одоо дахиж архи амсахгүй ээ” гэх амлалтандаа хүрч бүх зүйлийг шинээр эхлүүлэхээр зүтгэж яваа Б.Анх-Амгалантай ярилцсан ярилцлаганаас хүргэж байна.

Сэтгүүлч: Таньд өдрийн мэнд хүргэе.

Б.Анх-Амгалан: Өөрийнхөө бичлэгийг өглөө нь үзээд би арайч ингэж явж болохгүй ээ гэж их юм бодогдсон. Ингэж хог дээр үсэрсэнээс хүн шиг амьдарч яагаад болдоггүй юм бэ? Урагшаа алханаа гэж бодсон. Өнгөрсөнрүүгээ биш урагшаа харж амьдаръя гэсэн зорилго тавьсан даа.

Олон сар , жил уусан хүн чинь шоконд орно , бие хаа өвдөнө. Бараг л 7 хоног босож чадахгүй хэцүү байсан. Яг тэр үед “100 грамм архи татчих юмсан” гэж бодогдож л байсан. Тэгэхдээ би тэгээгүй. Чичирч хэвтсээр байгаад өөрийгөө зүгээр болголоо. Дуу хөгжимөө тоглоод явж байгаа минь нөгөө талаараа залуучууддаа бас зөв уриалахын тулд байгаа юм. Хүн хэдий муу зуршилтай ч гэсэн архийг бас нам зогсоож болдог шүү гэж уриалах гээд гадуур их явдаг.

Жил , хоёр жилийн дараа архи уухгүй явж байхад “Архи уухгүй хоёр жил болж , нээрэн ингэж болдог юм байна” гэж залуучуудад бодогдох болов уу? гэж бодож зорьдог.

Сэтгүүлч: Заримдаа архи уумаар бодогдох юмуу?

Б.Анх-Амгалан: Архи уух сэдэл байхгүй болсон. Энэ бол ерөнхийдөө зүгээр л сэтгэл санааны л асуудал. Өөрөө л больё гэвэл больчихоор. Яг үнэнийг хэлэхэд “Архинд донтлоо , шартлаа , уулаа ” л гэдэг энэ нь яс юман дээрээ өөрсдийнх нь сэтгэл санааны л асуудал. Өөрөөр хэлбэл дурандаа л уудаг байхгүйюу.

Сэтгүүлч: Архи уудаг хүрээлэлтэй болчихсон байгаа. Тэр хүмүүс нь “Чи хэзээ архи уудаггүй байсан юмбэ , Ганц татчих  , Ямар сүртэй юмбэ” гэдэг ч юмуу таныг хэр их уруу татаж байна вэ?

Б.Анх-Амгалан: Ер нь тааралдахгүй байгаа. Тааралдвал яах вэ дээ тэгээд л зовлонг нь мэддэг юм чинь тав , гурван цаас өгчихөөд л яваад өгдөг. Чи хамт уухгүй юмуу гэхээр нь үгүй ээ миний бие дийлэхээ байсан гэдэгдээ. Болж өгвөл хоол унд авч идээрэй гээд 5, 10 мянган төгрөг өгчихөөд би орхиод явчихдаг болсон.

20 хүрчих юмсан гэж боддог байлаа. 20-с хойш эргээд харахын хооронд л 30 гараад явчихдаг юм байна. Хамаг сайхан залуу насаа алдсандаа харамсдаг.

Сэтгүүлч: Одоо та хэдэн настай билээ?

Б.Анх-Амгалан: Одоо би 35 настай. Хамгийн оргил насаа алдсандаа харамсдаг гэх юмуудаа. Миний амьдралд маш олон боломжууд байсан. Ах , дүүс маань надад маш олон боломж олгосон. Тэдгээрийг алдсандаа харамсдаг. Яс юман дээр архи ууж яваа хүн ямар л олигтой араншин гаргах вэ дээ? Ах , дүүсээ маш их гомдоож , өөрөөсөө дөлүүлсэндээ харамсдаг

Сэтгүүлч: Таны төрсөн ээж хаана амьдарч байгаа билээ.

Б.Анх-Амгалан: Яг одоо Сайншандруу явсан байгаа.

Сэтгүүлч: Ер нь хотод амьдардаг билүү?

Б.Анх-Амгалан: Тиймээ хотод

Сэтгүүлч: Архинаас гарсанаасаа хойш ээжтэйгээ уулзав уу?

Б.Анх-Амгалан: Байнга холбоотой л байгаа. Очиж уулзаагүй байгаа. Ер нь жаахан санаа зовоод гэх юмуудаа. Цаг нь арай болоогүй гэж би бодож байгаа. Юманд цаг хугацаа хэрэгтэй. Цаг хугацаа хамгийн том эмч шүү дээ.

Сэтгүүлч: Цаашид ээжтэйгээ хамт амьдрах бодол бий юу

Б.Анх-Амгалан: Яг ний нуугүй хэлэхэд яг өөрийн гэсэн юмгүй болохоор би ээжийгээ яаж авчрах вэ дээ. Өөрийн гэсэн орон гэртэй бол сэгсгэр ч гэсэн ээж минь гээд хамтдаа байхыг хүсэлгүй яахав. Би ээжийнхээ өвөрт нэг сайхан унтахыг бараг мөрөөддөг дөө. Манайх хуучны тийм нэг сайхан айл байсан. Би өвөө , эмээ дээрээ өссөн. Амралтын өдрүүдээр бүгдээрээ цуглардаг. Нэгнийдээ заавал ирдэг, бужигналдацгаадаг яг тийм сайхан өссөн болохоор тэр нь гэнэт ингээд олон жилээр байхгүй болсон болохоор эргээд тэр сайхан бага нас , тэр гоё уур амьсгал үгүйлэгддэг. Уудаг шалтгаанд тэр мэр элдэв юм ганцаараа явж байхад их бодогддог. Сүүлийн жилүүдэд их ганцаараа явсандаа. Уусан ч хүн амьтанаас дөлж ганцаараа уудаг байсан.

Сэтгүүлч: Ах дүүстэйгээ ер нь холбоо барив уу?

Б.Анх-Амгалан: Намайг болохоос болохгүйг минь хүртэл их үзсэн. Сүүлдээ урам нь хугарсан байх. Ерөнхийдөө туйлдсан байх. Арга буюу зөнд нь орхисон доо.

Сэтгүүлч: Ах дүүстэйгээ уулзсан уу?

Б.Анх-Амгалан: 2017 оноос хойш уулзаагүй байгаа. 2017 онд эмээгийн ажил явдал дээр бүгд цугларсанаас хойш уулзаагүй. Одоо бүх юм дэвжээд явж байна. Цаг нь болохоор уулзана даа. Ах дүүсээсээ сайхан уучлалт гуйна аа. Уучлалт гуйгаад , өөрийгөө хүн шиг яваагаа харуулна. Өөрөө л хүн шиг явахад манай ах , дүүс баярлана. Би ингээд өөрийнхөөрөө яваад тодорхой хэмжээний хөөрхөн орлого олчихож байгаа. Тэрийгээ би хурааж хуримтлуулаад ямар ч байсан өөрийн гэсэн юмтай болно доо.

Би энд дурьдахгүй бол болохгүй. Манай он жавууд намайг суга татсан гэж хэлж болно доо. Их нөлөөлсөн. Дотоодын цэргийн 05-р ангид 2007 оны хаврын цэрэг татлага болсон. Цагдаа , цэргийн анхны төгсөлт байхгүйюу. Манай он жавуудын ихэнх нь ахмад , хошууч цолтой болцон. Энэ хөгжмийг авахад он жавууд маань их тусалсан. Он жавууддаа их л баярлаж явдаг. Одоо би нэг он жавынхаа байранд байгаа. Өдөр болгон “Миний найз гоё шүү” гэх мэт сайхан үгсийг надад хэлэн , маш их дэмждэг. Манай тэр он жавын эхнэр нь бас намайг их дэмждэг.

Сэтгүүлч: Та хүүтэйгээ уулзсан уу?

Б.Анх-Амгалан: Би Сайншандруу нэг явчихаад ирсэн. Хэдхэн хоночихоод буцаад ирсэн. Хүүтэйгээ уулзсан. Миний хувьд бол сайхан байсан л даа. Гэхдээ бас асуудал байсаан байсан. Тэрийг одоо нарийн ширийн яриад яах вэ.

Нэгдүгээрт хүн сэтгэлийн л амьтан. Хоёрдугаарт “Хүн ер нь архи уугаад ирэхээрээ , Би ямар архичин биш” гэж өөрсдийгөө боддог. Би ч гэсэн залуу байхдаа яг тэгж боддог байсан. “Ямар архичин биш , маргааш болъё гэвэл болъчихно шүү дээ” гээд л тэгж өөрөө өөрийгөө хаацайлдаг. Эсвэл тэр муу тэгээд гээд хэн нэгнээс шалтгаан, шантааж хайдаг. Миний хувьд бол ийм л байсан. Яс юман дээр зүгээр уух гээд л дурандаа тэр байхгүйюу. “Би маргааш болъчихно” гээд уугаад л яваад байдаг. Яс юман дээрээ архиндаа өөрийгөө уулгуулчихсан байдаг байхгүйюу. Ер нь бол эмчилгээ , тэр нэг код мод гэж хүний махан биеийг кодлоно гэж юу байх вэ. Тиймэрхүү юмаар бус зүгээр л сэтгэл зүрхээрээ л гарах хэрэгтэй . Архинд орж болсон юмчинь гарч яагаад болдоггүй юмбэ. Өөрөө дурандаа ууж болсон юмчинь зүгээр л энийг болъчихъё гэж яагаад болдоггүй юмбэ. Тийм биздээ.

Би архинаас болж пакталж явахдаа бичиж байсан , 10-аад жилийн өмнө өөрөө зохиож байсан шүлгээ уншъя.

  • Хүний амьдрал сонирхолтой
  • Хүслэнтэй бас хяслантай
  • Хясланг сөрж зогсовч
  • Хямарч туйлдан доройтно
  • Найм дахь сэхлийг авч чадалгүй
  • Намгийн ёроолд гүн шигдэнэ
  • Шигдсэн тэр газраа
  • Шингэж бүр уусна
  • Аргаа барсан тэр л мөчид
  • Архитай нөхөрлөж хорвоог үднэ
  • Амтлах тусам баясаж
  • Аажим аажмаар агсамнасаар
  • Атгахан зүрхэндээ бардамнаж
  • Амьдралын дардан замаа
  • Атиралдуулаад дахиад зурчих вийдээ
  • Тэгээд тэр замаараа
  • Тэмтчин тэмтчин гэлдэрнэ
  • Тэр зам хаа хүрэхийг
  • Тэр өөрөө ч мэдэхгүй…

Нэг ёсондоо өөрийнхөө л үзсэн юмыг шүлэглээд биччихсэн юм л даа. Би одоо яг “ингэнэ, тэгнэ” гэж хэлэхгүй. Зүгээр л ер нь цаг хугацаа л харуулна гэж хэлмээр байна. Харин намайг архи , дарс эргээд уучихна даа гэж хэлсэн хүмүүст хандаж хэлэхэд “Үгүй ээ,” гэж хэлмээр байна. Яах вэ тэгэхдээ шүүмжлэл дунд хатуухан боловч үнэн үгнүүд явдаг. Тусгах юмаа тусгаж , өөр дээрээ хүлээж авдаг. “Энэ хүмүүс ингэж байна , Тэгвэл энэ тал дээрээ анхаарах юм байна” гэж боддог.

Заавал ам хэлээрээ биш үйлдлээрээ өөрийнхөө байгаа байдлаараа хариу барих ёстой юм байна гэж дотроо бодож байгаа.

хэмээн энэхүү ярилцлагыг eguur.mn сайтад өгчээ.

Хүмүүс энэхүү ярилцлаганд дараах сэтгэгдэлтэй байна.

Сэтгэгдэл 1: Маш гоё эмх цэгцтэй сайхан ярьж байна. Ирээдүй гарт чинь байна Залуу минь. Хүчтэй, зоригтой, зорилготой байгаарай. Амжилт “Төгсгөлий нь үзэхгүй юм бол Эхлэлий нь бүү тавь” гэгчээр сайхан ирээдүй чамайг хүлээж байгаа шүү.

Сэтгэгдэл 2 : Энэ хүү яг одоо хаана байгаа юм бол. Зөв бодол, сэтгэлийг нь дэмжээд өгөхсөн.

Сэтгэгдэл 3: Үг хэл , бодол санаа их цэгцтэй сайхан залуу байна. Өөрийгөө ялаад байр сууриа олох гээд нийгэмд хөл нийлүүлж байгаад нь баяр хүргэе . Бас амжилт хүсье.

Сэтгэгдэл 4: Архи тамхинаас өөрийгөө захирч гарч чадна гэдэг бол үнэхээр гайхамшигтай эр зориг гэж боддог оо. Маш том баяр хүргэе.

Сэтгэгдэл 5: Энэ ухаантай , муу зуршлаа ялан дийлж яваа залуугаас олон олон залуучууд сургамж аваасай! Маш зөв логиктой ухаалаг яриатай залуу байна. Архинд орж болсийн яагаад гарч болохгүй гэж үг товч бөгөөд тодорхой маш энгийнээр хүнд нэгийг бодогдуулах Үг байлаа! Амжилт , эрүүл энхийг хүсэе!

Сэтгэгдэл 6: Уулзандаа гэж хэлэхдээ тэр нүд сэргээд ирж бнашдээ хөөрхий ах дүүс ээжтэйгээ түргэн уулзахыг ерөөе

Сэтгэгдэл 7: Хамгийн анхны 1-2 ярилцлага дээрээ сүр сар, хөөрүү, эмх цэгцгүй , нүд нь төвлөрөхгүй яриа өгсөн байсан. Тэгвэл одоо шаал өөр болжээ.

Эх сурвалж: eguur.mn

Цаг үеийн мэдээлэл

Борхүүг маргааш Богдхан ууланд нутагшуулахаар болжээ

Борхүүг маргааш буюу 2022.11.17-нд Дархан цаазат Богдхан ууланд нутагшуулахаар болжээ. Өвөрхангай аймгийн Зүүнбаян-Улаан сумын малчин Д.Буянтогтохын гэр бүл 2020 оны хавар 5-р сард осгосон байсан бугийн элийг тэжээн өсгөж Борхүү хэмээн нэрийдсэн байдаг билээ. Тэгвэл өнөөдөр Борхүү маань 3 нас хүрчээ.

Мэргэжлийн байгууллагын зөвлөмжөөр бол амьтны үр төл 3 нас хүрэхэд өөрийгөө зэрлэг амьтан болон хүний хөл хөдөлгөөнөөс хамгаалах , идэш тэжээлээ олж идэх чадвар тогтдог гэж үздэг байна. Тэгвэл Д.Буянтогтохын гэр бүл мэргэжлийн байгууллагуудтай зөвлөлдсөний үндсэн дээр хүний хөл хөдөлгөөнтэй газар амьдарч дассан Борхүүг Богдхан ууланд авчрах шийдвэрийг ийнхүү гаргажээ.

Ингэхдээ Богдхан уулын Тайны аманд амьтан асран хамгаалах чиглэлээр үйл ажиллагаа явуулдаг “Мөнгөн эгшиг” ХХК-ны талбайд эхлээд бэлчээрлүүлэх ба ирэх хавар Богдхан уулын дархан цаазат газрын Хамгаалалтын захиргааны хяналтад Богдхан ууланд нутагшуулах юм. Борхүүд хүрээлэн буй орчиндоо дасган зохицох чадварыг бага багаар суулгах зорилгоор “Амьтан асралт” ХХК-ын зөвлөмжийн дагуу байгалийн талбайд буга маллагч хариуцан хариулж, бэлчээрлүүлэх , идээшлүүлэх, ижил сүрэгт дасган оруулах юм.

Борхүүг 2022.11.17-ны өдөр Богдхан уулын Тайны аманд “Мөнгөн эгшиг” ХХК-ын бэлчээрийн талбайд нутагшуулан хүлээлгэн өгөх юм. Уг үйл ажиллагаа олон нийт, хэвлэл мэдээллийнхэнд нээлттэй бөгөөд цагийг маргааш зарлах гэнэ.

Эх сурвалж: Байгаль орчин , аялал жуулчлалын яам

ГОО БҮСГҮЙЧҮҮД

Энэ удаагийн Anuxai фитнесс шоунд хэн хэн оролцох вэ?

Анухай буюу Н.Анужин гэгч фитнессийн спортын гайхамшгийг харуулж буй энэхүү эмэгтэй бол Дэлхийн аварга шалгаруулах тэмцээний хошой аварга , Ази тивийн аварга шалгаруулах тэмцээнээс хошой алтан медаль тус тус хүртсэн , ОУХМастер юм. Хүчирхэг энэ бүсгүй мянга мянган залууст эрүүл амьдралын хэв маягийг үлгэрлэж чадсан.

Энэ удаад түүний хатуу дэглэм, хүчирхэг сорилтуудыг хэн хэн давах бол? Энэ удаагийн дугаарын 7 оролцогчийг танилцуулъя.  Энэ удаагийн дугаарын онцлог бол насны хувд эрс тэрс өөр , ажил мэргэжлийн хувьд ч тэс өөр , хүмүүсийн төсөөлөөгүй хүмүүсийг оролцуулсан болов уу?

1 . Оролцогч Б.Доржпагма

Уянгалаг цээл хоолой , дотоод сэтгэлийн торгон мэдрэмжээрээ бусдын хайрыг татагч  Дуучин Донна буюу  Б.Доржпагма. Цовоо сэргэлэн , эрч хүчтэй түүний сонирхолыг энэ удаад фитнессийн зааланд өрнөх халуухан өрсөлдөөн татжээ.

2. Оролцогч Д.Оюунзул

Асаж гэрэлтсэн харцтай энэ бүсгүй өөрийгөө шинээр асаахад бэлэн болжээ. Тайз дэлгэцийн олон бүтээлд дүрээ мөнхөлж , театрын урлагийн хүндэт Гэгээн муза шагналыг хоёр удаа хүртэж байсан нь түүний чансаатай уран бүтээлч болохын тод илрэл билээ. Түүний өөртөө итгэлтэй , аливаад тууштай байдал фитнессийн заалнаа хэрхэхийг харах үлдлээ.

3 . Оролцогч Б.Жагзмаа

Дизайнеруудын бүтээлийг тайзнаа амилуулагч , үзэсгэлэнт модель Б.Жагзмаа хөл хорионы үед хэвийн байдгаасаа хэтийдсэн тэрээр өмнөх гуалиг бие галбираа олж авахаар эрэлд гарч байна. Дөлгөөхөн энэ бүсгүй ширүүхэн өрсөлдөөнийг хэрхэн даван туулах бол?

4. Оролцогч О.Үржинханд

Гал гарсан тулаанд нэгдсэн дараагийн оролцогч бол О.Үржинханд. Зорилгодоо заавал хүрдэг , шийдэмгий , дайчин бүсгүй бие бялдарын тулаанд хэрхэн өөртэйгөө тэмцэх бол. Дасгалжуулагчийн хатуу шаардлагыг тэр хүлээн зөвшөөрөх болов уу?

5. Оролцогч Г.Ариунгэрэл

Өөрийн орон зайг урлагийн ертөнцөд тамгалсан Жүжигчин Г.Ариунгэрэл. Үргэлж завгүй хөдөлмөрлөж , инээд цацруулсан энэхүү бүсгүй олон ч багны цаана нуугдаж , өөрийн биеэ хувцасаар халхалсаар ирсэн гэнэ. Харин энэ шоу түүнд илүүдэл жинтэйгээ тэмцэх сүүлийн дайралт байх болно.

6. Оролцогч Х.Акбота

Өвөрмөц дуу хоолой , давтагдашгүй хэв маягийн илэрхийлэл Дуучин Х.Акбота. Эрс шийдэмгий хүчирхэг энэ бүсгүйн амьдралын хэв маяг бусдыг байлдан дагуулдаг. Санасандаа заавал хүрдэг хүчирхэг энэ бүсгүйг дасгалжуулагч Анухай номхруулж чадах болов уу?

7. Оролцогч Ч.Дэлгэрцэцэг

Хөгжмийн тансаг эгшигээр сэтгэл хөглөх , сонгодог урлагийн төлөөлөл Хийлч Ч.Дэлгэрцэцэг. Эрхэмсэг дүр төрх , донжтой яриагаараа бусдыг өөртөө соронз мэт татдаг нэгэн. Монголын томоохон шоунуудын хүндэт шүүгчээр ажиллаж байсан Хийлч бүсгүй фитнессийн зааланд шүгэлийн дуунд өөрөө шүүгдэхэд бэлэн боллоо.

Ийнхүү амьдралын хэв маяг , үзэл бодлоороо эрс ялгарах 7 бүсгүй өөрийгөө өөрчилөхөд бэлэн боллоо. Мягмар, бямба гараг бүрийн 20:30 цагаас ТВ-8 телевизээр танд хүрэх ажээ. Өөртөө хувьсал хийж, 20.000.000 төгрөгийн эзэн болох оролцогч хэн байх бол? Та хэнийг нь илүү дэмжих вэ?

Эх сурвалж: TV8 телевиз

Цаг үеийн мэдээлэл

Австрали улс “Дэлхийн 8 тэрбум дахь иргэн”-р Монгол хүүг нэрлэлээ

Дэлхийн хүн ам 2022.11.15-ны өдөр 8 тэрбум болсон. Дэлхийн 8 тэрбум дахь хүн Филиппинд төрсөн гэх мэдээлэл мөн явж байгаа ч мөн өөр орнууд ч 8 тэрбум дахь хүүхдийг тодруулсан юм. Учир нь улс орон бүр бэлгэдлийн чанартайгаар ийнхүү тодруулах боломжтой байдаг ажээ.

Филиппин, Армени, Беларусь зэрэг олон орон дэлхийн найман тэрбум дахь хүнийг зарласан бол Австрали улс Канберрад төрсөн Монгол хүүг найман тэрбум дахь хүн хэмээн зарлажээ. Энэ хүү нь Монгол хүү бөгөөд Анандын Мэргэн гэдэг талаар Канберра Таймс сонин мэдээллэсэн байна. Мэргэн хэмээх хүүгийн маань аавыг Батжаргалын Ананд , ээжийг нь Эрдэнэцогтын Лхагвасүрэн гэдэг ажээ.

Энд дуулгахад, дэлхийн зарим орон 11 дүгээр сарын 15-ны өдрөөс ч өмнө дэлхийн найман тэрбум дахь хүн аль хотод төрөх талаар тодорхойлж байсан юм. НҮБ-ын Хүн амын сангийн мэдээлснээр, найман тэрбум дахь хүнийг сонгох ёслол нь бэлгэдлийн чанартай бөгөөд улс орон бүр өөрсдийн хүсэлтээр тухайн өдөр төрж буй хүүхдүүдээс аль нэгийг сонгон, онцгойлох боломжтой байдаг ажээ. Учир нь дэлхийн найман тэрбум дахь хүн чухам хаана төрсөн гэдгийг тодорхойлох боломж туйлын хомс байдаг буюу секунд тутамд 2,6 хүүхэд дэлхий дээр мэндэлдэг ажээ.

Эх сурвалж: canberratimes.com.au , shuud.mn

Цаг үеийн мэдээлэл

Өнөөдөр 13:00 цагт НӨАТ-ын сугалааны азтангууд тодорно

Шинэчилсэн журмаар явагдах НӨАТ-ын сугалааны тохирол өнөөдөр буюу 2022.11.16-ны 13:00 цагт болох бөгөөд Боловсрол ТВ-ээр шууд дамжуулах юм.

Тохиролд 2022.10.01-2022.10.31-ний хүртэлх системд бүртгүүлсэн бүх баримт оролцоно.

НӨАТ-ын шинэчилсэн журмын дагуу сугалааны тохирол дараах байдлаар явагдана: Үүнд:

1-10 баримт бүртгүүлсэн дотор 3 орон таарвал 30.000 төгрөг , 4 орон таарвал 40.000 төгрөг , 5 орон таарвал 60.000 төгрөг , 6 орон таарвал 100.000 төгрөг ,  7 орон таарвал 500.000 төгрөг , 8 орон таарвал 5.000.000 төгрөг

11-50 баримт бүртгүүлсэн дотор 3 орон таарвал 40.000 төгрөг , 4 орон таарвал 60.000 төгрөг , 5 орон таарвал 100.000 төгрөг , 6 орон таарвал 500.000 төгрөг ,  7 орон таарвал 5.000.000 төгрөг , 8 орон таарвал 10.000.000 төгрөг

51-ээс дээш баримт бүртгүүлсэн дотор 3 орон таарвал 60.000 төгрөг , 4 орон таарвал 100.000 төгрөг , 5 орон таарвал 500.000 төгрөг , 6 орон таарвал 5.000.000 төгрөг ,  7 орон таарвал 10.000.000 төгрөг , 8 орон таарвал 30.000.000 төгрөгийн урамшуулал авахаар байна.

Мөн НӨАТ-ын сугалааны азтанд урамшууллыг олгохдоо төлбөрийн баримтыг цаасаар шаардахгүй ажээ. Таныг азын тэнгэр ивээх болтугай.

error: Content is protected !!