Цаг үеийн мэдээлэл

МУГЖ И.Одончимэг өнөөдөр Сити Их Сургуулиас Урлаг судлалын МАГИСТР зэрэг цолоо хүртэн авч байна

МУГЖ И.Одончимэг өнөөдөр буюу 2023.01.28-нд Сити Их Сургуулиас Урлаг судлалын МАГИСТР зэрэг цолоо хүртэн авч байна. Хэн бүхний мэдэх Одноо жүжигчиндээ халуун баяр хүргэе.

Түүний хамгийн сүүлд өгөөд байгаа ярилцлага болох urug.mn сайт-н Хөрөг нэвтрүүлэгт өгсөн жүжигчин хүний үнэ цэнийн талаар ярилцсан ярианы хэсгээс хүргэе.

И.Одончимэг: Жүжигчин хүний ажлыг маш амар , хялбар гэж ойлгодог хүмүүс их байна. Харахад их амархан , бэлдчихсэн зүйлс үзүүлээд байгаа мэт харагддаг. Энэ хүрэх хэмжээнд яаж ажилласныг хүмүүс шүүж тунгаадаггүй учраас уран бүтээлч хүмүүсийн ажлыг их амарханаар ойлгож , эд нар жаргаж мөнгө олдог , цэнгэж амьдардаг гэж ойлгодог. Гэтэл үгүйлдээ. Маш хүнд. Хар ажил гэж хэлдэг. Сард хэдэн удаа уйлж байна , сард хэдэн удаа хашгичиж , бачуурч байна. Зүв зүгээр байгаа энэ оюун тархи , мэдрэлээрээ хэдэн удаа тоглож байна , зүгээр байгаа энэ зүрхийг хэдэн удаа савлуулж байна, энэ бол хүнд төрлийн хар ажил.

Маш их зүрх сэтгэл, оюун тархи , амьдралаа золиослон амьдарч байгаа манай уран бүтээлчид хэлэхгүй боловч маш их амьдралын золиосыг үүрч яваа хүмүүс. Би “Ромьёо Жульетта”-д тоглож байхад , гурван цаг гаруй хугацааны жүжиг , маш их стресстэй , хүн харахад уйлдаг, шаналдаг , салдаг, хагацдаг эмгэнэлт жүжгийн оргил дүр шүү дээ. Тэр жүжигт би тоглож байхад үснүүд минь энэд тэнэдгүй халцарч унаж байсан. Тэгэнгүүт би мэдрэлийн эмчид үзүүлэхэд , энэ жүжигт тоглохгүй , хоёр жил завсарла гэж байсан. Тэгэхэд нь , “үгүй ” завсарлаж болохгүй. Театрын маш чухал жүжиг учраас чөлөө авахгүй тоглосоор байгаад , 3 жилийн дотор үс маань гүйцэт ургаж байсан. Тэгэхдээ ингэж зовж , жаргахдаа өөрсдөө дуртай. Үүнийгээ сонгосон учраас хэзээ ч ялархаж байгаагүй. Түүнийгээ хэзээ ч өвчин , зовлон гэж бодож байгаагүй.

Туулсан амьдрал , бүтээсэн уран бүтээлүүдээ бодоход өдий болтол би зүгээр яваад ирээгүй. Энэ хооронд хайртай олон хүнээ алдсан. Манай мэргэжил хагас цэргийн диктатуртай ажилладаг. Ганцхан би биш маш олон жүжигчид ээж , аавыгаа сэхээнд байхад энд байж л байдаг. Үзэгчдийг хүндлэх ёстой. Хамтын хөдөлмөр байдаг учраас хамт олны хөдөлмөрийн хүндэтгэх ёстой гэдэг үүднээс өөрийн хувийн амьдралаа золиосолдог. Би ч гэсэн аавыгаа сэхээнд ороод , хүн бүр ирээд салах ёс хий гээд дуудуулахад би очоогүй. Би энд жүжигтэй байсан. Би энд уйлаад л , тайзруугаа гараад л… Гэтэл би айлын хамгийн том охин. Миний ээж осолд ороод бүх мөч нь хугараад , шороо тоос холилддог бүх юмтайгаа холилдсон , тэнд охин хүүхэд хэрэгтэй байгаа. Тэнд эмэгтэй хүн , би л хэрэгтэй байгаа юм. Тэгтэл охин нь яагаад ирэхгүй байгаа юм бол оо гээд гэмтлийн эмнэлэгийнхэн гайхаж байсан гэсэн. Маргааш нээлттэй учраас өглөөнөөс орой хүртэл бүх сургуулилтаа дуусгачихаад , орой орж ирэхэд ээжийнхээ харцнаас яг намайг л хүлээж байсан юм байна гэдгийг нь шууд ойлгосон. Ороод л би хувинд бүлээн ус , алчуур хийгээд , ээжийнхээ бүх юмыг цэвэрлэхэд , ээж юу ч дугараагүй. Би “Яана аа ээж маань надад маш их гомдож байгаа болов уу , гомдоод л дугарахгүй байгаа юм болов уу” гэж бодож байсан. Тэгээд ээждээ “Ээжээ та… гээд хэлэхийн завдалгүй ээж маань хэлэхдээ “Юу ч битгий ярь, би чамайг ойлгохгүй бол хэн ч чамайг ойлгохгүй” гэж хэлж байсан. Тэгээд надад “Баярлалаа миний охин, охин үртэй байх ямар сайхан юмбэ. Ерөөсөө санаанд ортол хэн ч цэвэрлэж өгөөгүй.Чи л санаанд ортол ээжийгээ цэвэрлэж өглөө.” гэж хэлж байсан. (Уйлав). Тэгээд л би эргээд шөнө нь бэлтгэлдээ буцаад явж байсандаа

Эх сурвалж: urug.mn

Цаг үеийн мэдээлэл

Чехэд жирэмсэн Монгол эмэгтэй нас барсан байдалтай олджээ

Чех улсад амьдардаг Монгол эмэгтэй сураггүй алга болж албаны хүмүүс эрэн хайх ажиллагааг эхлүүлээд байсан юм.

Тодруулбал: Чех улсын Ческа Липа хотод ажиллаж амьдардаг манай улсын иргэн “Ц” гэх эмэгтэй 2023 оны 01 дүгээр сарын 25-ны өдөр гэрээсээ гараад ор сураггүй алга болсон юм. Харамсалтай нь тус улсын цагдаагийн алба хаагчид эмэгтэйг нас барсан байдалтай олсон байна. Чехийн цагаар 15 цагт амиа алдсан эмэгтэйг олсон бөгөөд талийгаач 38 долоо хоногтой жирэмсэн байжээ. Албаны хүмүүсийн мэдээлснээр талийгаач “салхилчихаад ирье” хэмээн гэрээсээ гараад сураггүй алга болсон байна. Одоогоор үхлийн шалтгаан тодорхойгүй байгаа аж.

Талийгаачийн гэр бүл, төрөл төрөгсөд, найз нөхөд, хамт олонд нь гүн эмгэнэл илэрхийлье.

Эх сурвалж: eagle.mn , livetv.mn

Цаг үеийн мэдээлэл

Монгол Улсын 3 сая дахь иргэн Х.Монголжин охин өнөөдөр 8 нас хүрлээ

Өмнөговь аймгийн Даланзадгад сумын “Засаг даргын Тамгын газар”-с Монгол Улсын гурван сая дахь иргэн, Даланзадгад сумын Гуравдугаар сургуулийн 2-р ангийн сурагч Х.Монголжинд төрсөн өдрийн мэнд хүргэжээ.

2015.01.24-ний 08:27 цагт Монгол Улс гурван сая хүн амтай болсон билээ. Гурван сая дахь иргэнээр Өмнөговь аймгийн Даланзадгад сумын иргэн Энхтүвшингийн Хатанболд, Ганбатын Аззаяа нарын ууган охин Х.Монголжин бүртгэгдсэнийг Үндэсний статистикийн хорооноос зарласан байдаг.

Сонирхуулахад: Монгол Улсын нэг сая дахь иргэн 1961 оны аравдугаар сард, хоёр сая дахь иргэн 1988 оны долоодугаар сард төрсөн. 1988 онд мэндэлсэн 2 сая дахь иргэнийг Аззаяа хэмээн нэрийдсэн бол 3 сая дахь иргэний ээжийг мөн л Аззаяа гэдэг аж. Харин 3 сая дахь иргэнд аав ээжийнх нь хүсэлтээр тухайн үеийн Монгол Улсын Ерөнхийлөгч Ц.Элбэгдорж “Монголжин” хэмээх нэр хайрлаж байсан юм.

Эх сурвалж: news.zindaa.mn

Цаг үеийн мэдээлэл

Сэрэмжлүүлэг: “Ээжийгээ хайж гэрээсээ гарсан 4 настай хүүхэд хоёр хөлөө тайруулахад хүрчээ”

Өчигдөр харгалзах хүнгүйгээр гэртээ байсан дөрвөн настай хүүхэд гэрээсээ гарч явсаны улмаас хөлөө хөлдөөсөн байна. Гүн хөлдөлттэй байсан учраас хурууг тавхайн хэсгээр нь тайрах мэс засал хийхээс өөр аргагүйд хүрчээ. Энэ талаар Urug.mn сайт Түлэнхийн төвөөс дараах сурвалжлагыг авчээ.

Хүйтний эрч чангарч байгаатай холбоотойгоор хүүхдүүд гар , хөлөө хөлдөөх , хайруулах тохиолдол их гарч байгааг Түлэнхийн төвийн эмч нар онцгойлон анхааруулж байна. Тиймээс эцэг эхчүүдийг хүүхдэдээ тавих хараа хяналтаа сайжруулахыг захиж байна.

ГССҮТ-ийн Түлэнхийн төвийн тасгийн эрхлэгч Ц.Нарантунгалаг: “Энэ жил малд явж байгаад хоёр гарын 8 хурууг хөлдөөсөн тохиолдол гарсан. Өчигдөр л гэхэд гэрт нь хүн байхгүй байхад хүүхэд нь гарч яваад , хөлөө хөлдөөсөн тохиолдол гарсан. Энэ хүүхдийн хувьд бол хөлөө тайруулна. Тавхайн хэсгээрээ 2 хөлөө тайруулахаар байна.”

ГССҮТ-ийн Түлэнхийн төвийн тасгийн эрхлэгч Ц.Нарантунгалаг: “Гүн хөлдөлттэй үед гар , хуруу , хөл дандаа тайрагддаг. Хүйтний үед бага насны хүүхдээ анхаараачээ. Хүүхдүүд чинь хөлдөөд байна шүү. Ер нь гар хөлөө хөлдөөсөн 0-16 насны хүүхдүүд жилд 5-7 ирдэг , дээд талдаа 10 болдог тохиолдол байдаг. Гэтэл энэ жилийн хувьд 7 хоногийн дотор 3 хүүхэд ирж байна. Эрсдэл их байна.” гэлээ.

Эх сурвалж: urug.mn

Цаг үеийн мэдээлэл

-41 хүйтэн тул зам цэвэрлэгээний ажилчдадаа цалинтай чөлөө өгчээ

Хан-Уул дүүргийн тохижилт, үйлчилгээ хариуцсан “Тохижилт, үйлчилгээний төв” ОНӨААТҮГ-ын гүйцэтгэгч “Эко Эрин тохижилт” ХХК нь өнөөдрийн цаг агаарын нөхцөл байдалтай уялдуулан шуурхай шийдвэр гаргаж , нийт ажилтанууддаа цалинтай чөлөө өгчээ.

Энэ талаар тус компани албан ёсны цахим хуудсандаа “Өнөөдөр -41C хүйтэн учир зам цэвэрлэгээний ажилчдадаа цалинтай чөлөө олголоо. Хогоо хогны саванд хийгээрэй. Баярлалаа” хэмээн бичжээ.

Тус гүйцэтгэгч компани нь Нисэхийн аюулгүйн тойрог, Хан-Уул дүүргийн 13-р хороо буюу Өлзийт хорооллын тохижилт үйлчилгээг хариуцан ажилладаг юм.

Эх сурвалж: livetv.mn

Цаг үеийн мэдээлэл ЭЕРЭГ МЭДЭЭ

Боорцогтой , хийцтэй цай

Хийе гэсэн чин сэтгэл байвал арга нь олддог гэдэг дээ. Олон жилийн судалгаа, туршилтын үндсэн дээр инноваци шингээн бүтээсэн “Говийн хийцтэй цай” брэнд маань худалдаанд гараад удаагүй ч хэдийнээ хэрэглэгчдийн талархлыг хүлээжээ

Өмнөговь аймагт үйлдвэрлэдэг бөгөөд өмнөх оны 10-р сарын 1-нээс Улаанбаатар хотноо худалдаалагдаж эхэлжээ. Тэр тусмаа GS25 сүлжээ дэлгүүрүүдийн бүх салбараар худалдаанд гарчээ.

Борц, нунтаг хийцтэй цай , шар будаа , шар тос , боорцог зэргийг аяганд нь тус бүрийг нь жижгээр савалжээ. Таньд халуун ус л байхад хангалттай аж.

Бөөний үнэ нь 3500 ба GS25 сүлжээ дэлгүүрүүдэд зарагдаж байгаа жижиглэн үнэ нь 4500 гэнэ.

Говь нутгийн уламжлалт цайны соёл буюу нутгийн иргэдийн хэлж заншсанаар “Унд” хэмээх өдрийн хоолыг инноваци шингээн бүтээсэн “Говийн хийцтэй цай” нь хэрэглэгч таны цаг завыг хэмнэхээс гадна гэрийн цайг орлож ядаргаа тайлах тустай.

Гэрийн цайг орлож , ядаргааг тайлах , хаана ч хэрэглэх боломжтой энэхүү бүтээгдэхүүнийг бүтээсэн хамт олонд баярлалаа.

Цаг үеийн мэдээлэл

Ө.Уянга: “Ажлаасаа халагдчихлаа , театрын ажил ургашгүй байгааг шүүмжлэх төдийд л халчихдаг болсон юм уу”

ДБЭТ-ын гоцлол дуучин , МУГЖ Ө.Уянга театраасаа шалтгаангүйгээр халагдсан талаараа өөрийн албан ёсны цахим хуудсаараа дамжуулан мэдээллэв.

Ө.Уянга: “Ажлаасаа халагдчихлаа. ДБЭТ-ын хамт олондоо баярлалаа , шалтгаангүй шахуу халагдлаа даа. Мэргэжлийн хувьд шаардлага тавьж театрын ажил ургашгүй байгааг шүүмжлэх төдийд л халчихдаг болсон юм уу? Театр элгээрээ хэвтчихээд байгаа нь үнэн шүү дээ. Хувийн өс хонзонгоор ажлаа хийх байсан юм уу. Сайхан халагдлаа. Уг нь дуучных нь хувьд хүндэлдэг байсан юм” хэмээн бичжээ.

Цаг үеийн мэдээлэл

Маргааш , нөгөөдөр жилийн оргил хүйтэн болж -41-46 градус хүрч хүйтэрнэ.

Цаг уур , орчины шинжилгээний газраас гаргасан мэдээллээр 2023.01.21-с хүйтний эрч чангарна. Зүүн аймгуудын нутгаар хүйтний эрч чангарч шөнөдөө -41-ээс -46 градус хүрч хүйтэрнэ. 01.21-01.23-ны өдрүүдэд жилийн оргил хүйтэн өдөр тохионо гэдгийг цаг уурчид анхаарууллаа.

Тодруулбал: Энэ амралтын өдрүүдэд Монгол орны нийт нутгуудаар хүйтэрнэ. Тэр дундаа эх орны зүүн хязгаар бүс нутагт олон жилийн дундажаас цочир хүйтэрч хөрсөн дээрээ -41-ээс -46 градус хүрнэ гэдгийг Ус цаг уур , орчины шинжилгээний газраас сэрэмжлүүллээ. Энэ хүйтрэл 2022-2023 онуудад болж байгаагүй буюу хүйтний эрч оргил үедээ хүрэх юм байна. Тиймээс малчид ард , иргэдийг сонор сэрэмжтэй байхыг цаг уурын байгууллагаас анхаарууллаа.

Цочрол хүйтрэл ихэнх нутгаар энэ сарын 20-с эхэлж , амралтын өдрүүдэд хүйтний эрч чангарч олон жилийн дундажаас чангарч Улаанбаатар хотод 01.21-01.23-ны хооронд шөнөдөө -38-аас -40 градус хүрнэ.

Эх сурвалж: C1 телевиз

Цаг үеийн мэдээлэл

Тагнуулын хэргээр Яруу найрагч Ц.Хуланг хорих 461-р ангид хорьжээ

Яруу найрагч Цоодолын Хуланг Эрүүгийн хуулийн 19.4.1 зүйл ангиар Тагнуулын Ерөнхий газраас өнгөрсөн шөнө 01:00 цагийн үед саатуулжээ. Түүнийг одоо хорих 461-р ангид хорьсон бөгөөд хэргийн мөрдөн байцаалт үргэлжилж байна.

Эрүүгийн хуулийн 19.4.1-р зүйл заалтанд: “Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан бол найман жилээс арван таван жил хүртэл хугацаагаар хорих ял шийтгэнэ.” хэмээх заалт байдаг.

Ц.Хулан нь Монгол улсын Ерөнхийлөгч асан Х.Баттулгын соёл шашны бодлогын орон тооны зөвлөхөөр ажиллаж байв.

Эх сурвалж: zarig.mn

Цаг үеийн мэдээлэл

ЗАСГИЙН ГАЗАР: “Хүүхдийн мөнгөн тэтгэмжид хамрагдахад таны мэдээлэл алдаатай болон зөрүүтэй байгаа бол дараах мэдээлэл хариуцагч байгууллагуудад хандана уу”

“Засгийн Газар”-аас дараах мэдэгдэлийг хийлээ: “Хүүхдийн мөнгөн тэтгэмжид хамрагдахад таны мэдээлэл алдаатай болон зөрүүтэй байгаа бол дараах мэдээлэл хариуцагч байгууллагуудад хандана уу. Хүний хувийн мэдээлэл хамгаалах тухай хуулийн дагуу иргэн таны зөвшөөрөлгүйгээр мэдээллийг засах боломжгүй болно.” гэжээ.

1.Өрхийн ам бүлийн мэдээлэл зөрүүтэй бол Орон нутагт бол тухайн “баг” , Нийслэлд бол “Хорооны Засаг дарга”-д хандана уу.

2. Хүүхдийн мэдээлэл зөрүүтэй бол өөрт ойр байрлах “Улсын бүртгэлийн нэгж”-д , тоо зөрүүтэй бол баг , хорооны Засаг даргад тус тус хандана уу.

3. Өрхийн үл хөдлөх хөрөнгийн мэдээлэл зөрүүтэй бол өөрт ойр байрлах “Улсын бүртгэлийн нэгж”-д хандана уу.

4. Өрхийн тээврийн хэрэгслийн мэдээлэл зөрүүтэй бол “Харъяа аймаг, дүүргийн Авто тээврийн төв”-үүдэд хандана уу.

5. Өрхийн малын мэдээлэл зөрүүтэй бол Орон нутагт бол “баг” , Нийслэлд бол хорооны Засаг даргад хандана уу.

6. Өрхийн цалингийн мэдээлэл зөрүүтэй бол “Харъяа нийгмийн даатгал”-ын байгууллагад хандана уу.

7. Өрхийн орлогын мэдээлэл зөрүүтэй бол “Татварын цахим тайлангийн систем”-ээр шалгах боломжтой. Татварын албанаас 1800-1288 утсаар зөвлөнө үү.

Эх сурвалж: mass.mn

error: Content is protected !!